خواطر عن مواقع الانتخابات المصرية (من الاستفتاء للرئاسية)

بعد حوالي سنة من الشغل مع شركة eSpace و وزارة التنمية الادارية في مواقع الاستفتاء و الانتخابات البرلمانية و اخيرا موقع الانتخابات الرئيسية حبيت اتكلم شوية عن اللي الواحد اتعلمه و شافه في الكواليس :)يمكن اي حد حيقرأ الكلام ده حيقول و ماله ديه ناس بتعمل شغلها و بتقبض علشان تعمل كده، اسمح لي اقولك لو اللي شغالين في المشروع ده مجرد موظفين كان اخركو حتشوفوا موقع معمول بـ Microsoft Word و بدل متشوف انت مسجل في انهه لجنة كنت حتدخل تنزل PDF زي اللي كانت موجودة فى 2005 و تدور على نفسكفي نفس الوقت ناس كتيرة كانت فاكرة ان كل ده مجهود اللجنة، اسمح لي اقولك ان لو على اللجنة، هم محتاسين خلقة و الله يكون في عنهم و مش عايزين لا مواقع ولا وجع دماغ. لولا وجود فريق وزارة التنمية الادارية و كمية المخاطر اللي اخدوها و المجهود اللي بذلوه علشان اقناع الناس ديه، مكناش شفنا اي حاجة.الفريق اللي شغال في الموقع ده معظمة ناس كويسة جدا ماديا و نفسيا ( و ده اهم من اي حاجة )، الفريق في اوقات الذروة (شهر الانتخابات) كانوا و مازالو بيشتغلوا اكتر من 18 ساعة متواصلة علشان مصلحة المواطن و البلد. و مكنش فيه واحد همه مين اللي حياخد الـ credit ! و متوسط اعمار الفريق 27 – 28 سنة.تصويت المصريين في الخارج كان كله تقريبا مسؤلية الفريق ده، و كانو ممكن يكبروا دماغهم و يسيبوا الموضوع ده على الخارجية، لكن كانوا بيحاربو علشان يسهلوا الدنيا على المواطنين اللي في الخارج.

كمية المقاومة و الغباء الاداري اللي الناس ديه شافته كفاية يدخلهم الجنة :)

كل واحد كان عليه Task ممكن يعملها في ساعة، كان بياخد ساعتين علشان يتقنها و يطلعها احسن حاجة.

ناس كتيرة جدا كالعادة قعدت تفتي و يقولوا (الموقع ده بيتعملوه هاكر بسهولة D:) ، (متكتروا السيرفرات شوية، ده بطيق قوي) ، (ده شغل اي حد ممكن يعملو و موقع عادي جدا)، و كلام عبيط كتير من ده. الشغل التقني المعمول في الموقع ده معقد جدا علشان المحافظة على سرية العلومات و سرعة. الموقع عليه حوالي 5 قواعد بيانات كل واحدة حوالي 40 مليون record !
فيه حوالي 40 سيرفر مخصصين للموقع و في زيادة. و يا ريت تاخدوا بالكو ان البنية التحتية في مصر مش جامدة قوي كدة :)
اكبر موقع في مصر كان موقع نتيجة الثانوية العامة و كان اخره نصف مليون طالب، المره ديه فيه حوالي 20 مليون مواطن. والله ماكنش فيه حاجة ممكن تتعمل و متعملتش :)

مفيش اي تزوير او لعب او اي كلام فاضي من اللي بيتقال ده في الموقع. لو فيه خطأ حصل ( و ده كان مرة او مرتين بالكتير ) فده كان خطأ بشري عادي جدا غير مقصود لمصلحة اي حد.

اخيرا و ليس اخرا ( مع اني مش عارف الفرق ) ادعوا لنا :) و انتخبوا حد يصلح حال البلد :)

Leave a comment

 

WP-SpamFree by Pole Position Marketing