كام واحد سألته عامل ايه فى شغله و قالك مبسوط ?

كام واحد سألته عامل ايه فى شغله و قالك مبسوط ؟؟ انا شخصيا، 2 بس اللى قالولى كده، و الباقى يا اما فعلا الدنيا عنده بايظة، يا اما اتعود على الشكوة ! الفكره فى موضوع الشغل ده نسبية جدا، بمعنى لو انت بتشتغل 12 ساعات فى اليوم و بتقبض 120 جنيه فى اليوم مثلا، اكيد احسن 100 مره من اللى بيشتغل 8 ساعات فى اليوم و بيقبض 50 جنيه ! و ناس كتير من اللى بتشتكى بتبقى بتقبض كويس و شغاله فى Multi-nationals !كتر الشكوى عمال على بطال بيسد النفس، مش بس بيسد نفسك، لأ بيسد نفس اللى حواليك كمان ! و بعدين بيبقى فيه رد كويس للموضوع ده، لو مش عجبك الشغل ده سيبه ! بسيطة يعنى ! و دور على شغل تانى! و متعقدش تقولى البلد مافيهاش شغل !! علىشان الشغل على قفى (اول مره اعرف ان قفى ينفع تتكتب) من يشيل ! و لو دورت كتير و ملاقيتش، يبقى يا اما انت غير مؤهل و محتاج تشتغل على نفسك شوية و تزود خبرتك، يا اما انت بتدور فى الحته الغلط، يا اما بقى انت عندك حاجة جديدة و عايز تعملها و شكلك كده من اللى بيقولوا عليهم Entrepreneurs و ربنا يهديك بقى !!

فيه ناس تانية بتبقى مضايقة انها شغالة فى حاجة مش بتحبها، مع كامل لحترامى سيبك من اي حد يقولك (حب ما تعمل حتى تعمل ما تحب و شغل اسامه منير ده)، عمرك ما حتبقى شاطر فى حاجة و متفوق فيها اللى لو انت بتحبها، و اوعى تفكر الحاجة اللى انت بتحبها ملهاش شغل او مش حتجبلك فلوس، لأ اتأكد انك اسهل حاجة ممكن تعملها الفلوس (الا طبعا لو عايزة تتجوزى و تقعدى فى البيت، ده موضوع تانى) بس اعمل اللى انتى بتحبه، وساعتها حتشتغل 16 ساعه فى اليوم و انت مبسوط و راضى جدا عن كل دقيقة بتشتغل فيها.

للأسف ان المجتمع اللى اتربينا و اتعلمنا فيه خلى معظمنا يطلع مش عارف اصلا هو بيحب ايه، ساعتها ارجع اقولك (حب ما تعمل) !! ماهو اصل ملهاش حل تانى !! و بعدين يومك فى الشغل و مودك، دول انت اللى بتتحكم فيهم !

ابدأ يومك بسماع حاجة انت بتحبها (قرأن – موسيقى – مسرحيات – راديو – اى حاجة انت بترتاحلها) ، خليك مبتسم و سعيد (ايوه زى العبيط، عادى جدا) اهم حاجة انك تبقى مبسوط، محدش ليه عندك حاجة، حاول تستمتع بأى حاجة و كل حاجة فى شغلك، لو لقيت قلم واقع و انت شيلته حطيته على المكتب، فأتأكد انك عملت حاجة جامدة جدا طالما ان فيه حد قبلك شافها و معملهاش و انت احسن منه 100 مرة !!

يعنى، فكر فى نفسك و اللى حواليك و حاول تبقى راضى عن شغلك، علشان بقيت الناس اللى حواليك ملهاش ذنب فى العكننة ديه !

و شكرا لوقتك، و يارب ميكونش راح على الفاضى