وجهة نظر – جواز الصالونات

مبدأيا قبل اى حاجة، خلينا متفقين ان الكلام ده مجرد وجهة نظر شخصية و مقدرش انكر ان فيه جوازات كتيرة جدا ناجحة جدا جدا.و لكن وجهة نظرى ان الموضوع ده مش شيك خالص و سعات بحس انه فيه تقليل من الأدامية !بمعنى، ان الواحد يروح يقيم بنى ادم زيه علشان يبقى شريك حياته مش حاجة لطيفة خالص، لأن افرض طرف منهم معجبهوش التانى !! ايه شعوره ؟؟ يعنى انا اروح لواحد او واحدة تتفرج عليا و انا اتفرج عليها و لو معجبتنيش اشوف غيرها !! طب فرق ايه الموضوع ده عن اى منتج !! او حتى المدارس International !! اعتقد ان العلاقة المفروض تكون ارقى من كده بكتير !!الحاجة التانية، ان بحس ان اللى قاعد بيقول لحد دورلى على عروسة او عريس، و مش هو اللى حيختار بنفسه، ده واحد مش بيبذل اى مجهود فى انه يدور على شريك حياته !! يبقى ازاى يعتمد عليه !! على فكرة ديه برضه مش قاعدة ! علشان اعرف ناس كتيرة عملت كده و يعتمد عليهم جدأ، بس ديه ارآ

بس برضوا مش معنى كلامى ان لازم كل الجوازات تبقى ناتجة عن قصص حب وهمية و ال Couple يبقوا زى العصافير ياخواتى !! لأن دول برضوا فيه منهم كتير جدا بتبقى فاشلة !

بس الموضوع ممكن يبقى اذكى و اشيك من كده. بمعنى، انت جدع او انتى جدعة و عايزين تظبطوا اتنين صحابكوا مع بعض و قصدكم شريف و كتر 1000 خيركوا، مش لازم بقى تقولوا للطرفين انكوا عايزين تظبطوهم !! متخرجوا مع بعض و استعبطوا و كأنكوا قابلتم الاتنين صدفة، و ساعتها حتحسوا بانطباع الطرفين عن بعض، من غير ما تهين او تكأب اى طرف فيهم و تقولوا انه مش عاجب الطرف التانى !!

اخيرا، شوفوا حواليكوا المجتمع بقى عامل ازاى والمتجوزين بقى نسبة كبيرة منهم شكلها يسد النفس !! تشوفهم فى Mall تلاقى لازم بين الاتنين متر و طرف فيهم سابق الطرف التانى، يا اما الاتنين جنب بعض بس ده باصص فى حته و هي بتبص فى حتة تانية و حاجة عجيبة !! اكيد طبعا الدنيا صعبة و مليانة مشاكل بس اعتقد اختيراك للطرف التانى بمزاجك و بطريقة شيك من الاول علشان انت عايزه مش علشان اتعرض عليك و قلت ماشى اهو احسن من غيره حيخلى الدنيا احسن شوية !

و تعيشوا فى تبات و نبات و تجيبوا صباين و بنات اسمه هو اللى حياخدوه منه و بس !

شكرا لوقتك و يارب مايكونش ضاع على الفاضى